ما تيجو نعمل زى النمله

ما تيجي نعمل زي النملة !!

اللي يتابع منكم عالم النمل هيشوف العجب العجاب .. سبحان الله ..

طيب هي النملة بتعمل إيه ؟؟

تعالو نشوف كدة ...

1 - حُب الخير للغير :

سبحان الله .. لما النملة تشوف أي حاجة ( رزق من الطعام مثلاً ) ، تلاقيها على طول بعتت تنادي على بقية النمل علشان يشوفوا الرزق ده وكل نملة منهم تيجي وتاخد نصيبها ..

دايماً تلاقي نملة واحدة .. وبعد لحظات قليلة جداً تلاقي جيش جرار من النمل جاي يشوف الوليمة بعد ما النملة الأولى أرشدتهم للطريق !!

2 - الإصرار والعزيمة القوية :

النملة - سبحان الله - عندها إصرار وعزيمة غير عادية .. لما بتكون طالعة لهدف محدد تلاقيها مهما حصل بتحاول تعمل أي شيء علشان توصل له ..

لو شفت نملة ماشية ورايحة في اتجاه حاجة محددة ، وحاولت تمنعها ( بوضع أي عائق في طريقها ) تلاقيها بتلف من ناحية تانية ورايحة في اتجاه نفس الهدف ..

ومهما حاولت تمنعها .. هتلاقيها بتحاول تلف وتيجي من أي اتجاه ( بدون ملل أو يأس ) .. لغاية ما تلاقيها وصلت فعلاً للهدف اللي كانت شايفاه من بعيد ..

3 - عارفة قدر نفسها وقدر الآخرين ( الحذر من الهلاك المُحقق ) :

النملة مخلوق ضعيف .. وهي عارفة كويس انها ضعيفة ، علشان كدة مش بتحاول تعرّض نفسها لأي خطر ممكن يتسبب فيه مخلوق آخر أقوى منها ..

ولما بتحس انها مُعرضة للأذى المحقق بتسرع جداً في الهرب ..

مش لوحدها .. لأ دي كمان بتحرص أن كل النمل اللي معاها ( أصحابها وأهلها ) أنهم يحموا نفسهم من الخطر ده

النملة عارفة انها ضعيفة وأن سيدنا سليمان وجنوده ( البشر ) أقوى منها .. وأنهم ممكن مياخدوش بالهم من النمل أصلاً لأنه صغير جداً ..

شوفوا كدة المشهد ده :

" حَتَّى إِذَا أَتَوْا عَلَى وَادِ النَّمْلِ قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ "

4 - النظام .. ثم النظام :

النمل منظم جداً ( في شكله ) ، يعني لما تلاقي مجموعة من النمل ماشيين مع بعض في مكان ، تلاقيهم عادة ماشيين في طابور خط مستقيم ورا بعض ..

مع إن عددهم كبير جداً .. لكن سبحان الله .. النظام سمة من سمات طوابير النمل !

5 - لا لتضييع الوقت .. ومرحباً بالتعاون المُثمر :

النملة تلاقيها معندهاش وقت تضيعه .. كل النمل بيشتغل مع بعض في نفس الوقت ..

مفيش حاجة إسمها نملة بتتدلع !

أو نملتين واقفين مع بعض على جنب بيتكلموا وسايبين بقية النمل يشيل أو يشتغل لوحده ..

تلاقي كل النمل بيساهم في العمل ، وكلهم بيشيلوا مع بعض ومحدش منهم بيتكبر على العمل !

6 - السعي لطلب الرزق :

النملة لما بتكون محتاجة أكل أو محتاجة تشرب ميه ، مش بتستنى حد يشفق عليها ويجيب لها طلبها لغاية عندها ..

تلاقيها بتروح بنفسها وتسعى لغاية ما توصل للأكل أو الشرب ( مهما كلفها ذلك من وقت أو عناء )

7 - التزود للمستقبل :

النملة عارفة ان خروجها في فصل الشتاء لطلب الرزق ( الطعام والشراب ) شيء صعب جداً بالنسبة لها ..

علشان كدة تلاقي النملة بتحاول تخزن اللي هتحتاجه من مخزون لفصل الشتاء خلال فصل الصيف ..

يعني في الصيف مش بتجمع بس الأكل اللي يكفيها في الصيف ، ولكن بتجمع أيضاً الطعام اللي يكفيها في فصل الشتاء كمان ..

النملة بتعمل حساب للوقت اللي هي عارفة ومتأكدة انه مش هتقدر تعمل فيه أي حاجة تنفعها ساعتها ..

....................................

خلصت كدة الحدوتة بتاعة النملة ..

لكن مش ملاحظين حاجة ؟!

إن الحاجات دي المفروض اننا فعلاً نعملها ؟

مش علشان نقلد النملة .. لأننا أكيد أقوى وأذكى من النملة بمرااااااااااحل !!

طيب عارفين ليه ؟

أو بمعنى أصح .. خلينا نقول فزورة :

حد يقدر يجيب لنا آية أو حديث فيهم إشارة لحاجة من الحاجات اللي اتكلمنا عليهم دول ؟

نايس توبيك

» تعالو نعمل حوار جامد جدا بين الشباب والبنات