تيحيا جمهوريه الصين الشعبيه حبيبه الكييفيه

السلام عليكم يابا الحاج ابو الهول.. أصل أني كنت ف مشوار جوريب منك جولت أعدي أسلم عليك وأحكيلك علي موضوع كيديه …. بس والنبي تخليه سر يبنتنا وما تجولش لحد من البهوات صحابك وخصوصا البيه وزير الداخليه

أصل الواد "بشندي الجعر" أيوه الجعر أبوه سماه كيديه "جعر" وهو شكله جعر وكل حاجه فيه جعر أصله واد "نتن" ولا مؤاخذه وبيبيع مخدرات في البلد

امبارح الواد الجعر ده كان جاعد ف الغرزه بتاعت الواد حسانين الجربوع بيشرب ولا مؤاخذه حجرين متغمسين والدنيا ليل والليل ستار

وبعدين يابا الحاج أبو الهول الواد الجعر ديه طلع من جيبه علبه ولا مؤاخذه كيديه صفيح وشكلها حيلو وجام فاتحها وطلع منها حته حشيش ولا مؤاخذه جد نص كف ايدك … جامت الناس ولا مؤاخذه المساطيل اللي جاعدين في الغرزه فاتحين حنكهم وجالوا ايه ديه ياد ياجعر هو الحشيش اتطور والا ايه الحشيش بجي في علب علشان محدش يسرق م الوزن بتاعه والا ايه

جام الواد بشندي الجعر ولا مؤاخذه جايل ليهم ياعالم ياللي ما بتفهموش ديه "الحشيش الصيني" أي والنبي "الحشيش الصيني"

جامت العالم المساطيل اللي جاعدين في الغرزيه كلاتهم جايلين في نفس واحد تيحيا جمهوريه الصين الشعبيه حبيبه الكييفيه

وكل نفر منهم حط حنكه ف ودن اللي جمبه وهات ياودوده ولا مؤاخذيه كانوا بيجولو ان حكومه الصين ديا أجدع م الحكومه بتاعتنيه ولا مؤاخذيه كيديه حامله هم الكييفيه وبتوفر ليهم الصنف المفتخر لزوم الكيف أمال ايه حكومه والا بلاش … مش زي حكومتنا اللي كل شويه تافش ف الكييفه اللي شايل "تمنه" في جيبه واللي شايل "حجرين" يعملولهم جواضي .. وسايبين الجماعه الكبرات كلاتهم

طب يابا الحاج أبو الهول ولا مؤاخذه ف دي السؤال هون مين البيه الكبير اللي بيستورد الحشيش المفتخر ده من الصين....؟؟

أكيد برضك البيه ديه غلبان وصاحب عيال وعايز يربيهم عشان كيديه بيستورد الحشيش من الصين والحكومه بتاعتنا فاتحه الاستيراد والتصدير علشان الجماعه الكبرات دول ياكلوا عيش

استر علي الناس يارب