فين المشكله انتى مش هتبقى مراتى؟؟؟؟

(ايه المشكلة انتى مش هتبقي مراتى؟)

كلمة .. سمعناها كتير جدا جدااا
حدود كتير جدا
للأسف
بقينا بنتخطاها تحت ذلك الشعار
===============
مشهد رقم (1)
العلاقة الاساسية .. زمالة
المبرر .. بيحبوا بعض
===============
* ايه ده انت بتعمل ايه عيب كده
_ ايه بس فى ايه ؟؟ ايه المشكلة ؟؟
* انت ازاى بتمسك ايدى كده !!
ايه بس هو مش احنا بنحب بعض ؟؟
ايوه بس بردو .. ميصحش يعنى
_ يووووووه بقي انتى ليه محسسانى انى بعيد عنك كده .. ايه المشكلة يعنى انتى مش هتبقي مراتى ؟؟
بكل كسوف .. ده بجد يا حبيبي ؟؟
اه طبعا امال انتى فاكرانى عيل من بتوع اليومين دول طيب والله انا عاوز اتجوزك(ويا رب صبرنى ع صيام ال3 ايام دول) .. وايديه راحتت تتسحب تانى
*لالالالالالا استنى عيب كده احنا قدام الناس (خدنى ف ركن يعنى ) !!
............................
================
مشهد رقم (2)
العلاقة الاساسية ..خطوبة
محل الحديث .. التليفون
===============
ايوه يا روحى ازيك
روحك ؟ مين ؟ انا ؟؟
ايوة يا حبيبتى طبعا احنا مش مخطوبين لبعض ولا ايه
-ماشي مختلفناش بس الخطوبة دى وعد بالزواج .. مينفعش تكلمنى كده انا لسه مش محللة ليك
= يعنى انتى ايه رأيك هو انا خطبتك مش علشان اتجوزك ..!
-ياااه ده انا بجد بحلم باليوم ده
قلبي
تانى؟
سؤال وعاوزله رد واحد
اتفضل
انتى مش هتبقي مراتى ؟؟
-................
انا عارف انك مكسوفة
-..................
احكيلى بقي يا حياتى عملتى ايه النهارده؟؟
خدت نفس ودقيقة وردت .. ياااه ده انا عملت كتييييير رحت لـ..................... (كده خلاص اتسبتت)
............................
===============
مشهد رقم (3)
العلاقة الاساسية ..النت
المبرر.. بيحبوا بعض !
===============
مقلتليش بقي هنتقابل امتى
نتقابل !! يا لهوىىى
ايه بس مالك
ماليش بس نتقابل بتاع ايه
هو ينفع يعنى مشوفش اللى هتبقي مراتى
ياه مين دى
ايه ؤمال انا بحبك ليه يعنى مش علشان نتجوز
ايوه ايوه صحيح
وطبعا لازم تبعتيلى صورتك علشان لما نتقابل بقي اعرفك وكده (يا حلاوة حبها من قبل ما يشوفها)
لأ ف دى عندك حق
ونمرتك
ليه نمرتى
افرضي انا حصلى ظروف واتأخرت ع مراتى المستقبليه مش يبقي اطمنها ؟
مش عارفة ازاى فاتت عليا دى .. بس تعرف بجد انا ارتاحتلك وواثقة فيك جدا
يا حبيبتى انا مرتاحلك من زمان ده انا كنت هموت نفسي علشان اوصلك
ايه ده ازاى ؟ده انا بكلمك من يومين وانت قلتلى بحبك امبارح
ايوه ما انا معجب بيكى من زمان اوى من اول يوم شفتك فيه معانا فى المنتدى
ايوه فعلا ده كان من زمان .... من ييجى شهر كده .... وكل ده فى قلبك وساكت ؟؟
كنت خايف تصدينى
شكلك كان واقع
ها ؟اه طبعا جدا جدا ... ها هشوف ملاكى امتى ؟ فاضية بعد بكرة
استنى افكر
لالالالالا هيا لسه فيها تفكير !!
انت افتكرت ايه لالا ده انا بفكر هنتقابل فين امتى .. الموضوع محتاج تفكير بجد
ودى حاجات بسيطة جدا
وما خفى كان اعظم
فى حاجات مختلفة بتتطلب تحت شعار ( هو انتى مش هتبقي مراتى ) ؟؟؟
المشكلة انى بقيت بسمع قصص كتير كل بلاويها محورها الكلمة دى
مش هتكلم كتير بس هقول لكل بنت .. حافظى عليكى
ولكل ولد .. اتق الله وخليك راجل بجد !!